Google Partner necə olmaq olar: tələblər, addımlar və statusun saxlanması

Google Partner nədir

Google Partners Google Ads hesablarını müştərilər adından idarə edən agentlik və şirkətlər üçün proqramdır. Proqrama qoşulmaq üçün Google Ads menecer hesabı (MCC) lazımdır. Tələbləri qarşılayan şirkət "Google Partner" nişanı alır və Google Partners kataloqunda görünə bilər.

Nişanın iki səviyyəsi var:

Nişan agentliyin keyfiyyətinə zəmanət deyil. O, minimum tələblərin yerinə yetirildiyini göstərir. Müştəri üçün daha vacib sual agentliyin sizin sahənizdə necə nəticə əldə etdiyi və hesabatın necə qurulduğudur.

Üç əsas tələb

Google tələbləri üç kateqoriyaya bölür və onlara gündəlik baxılır. Aşağıdakı rəqəmlər rəsmi səhifədən götürülüb.

1. Performans: optimization score

Google Partners-də qeydiyyatdan keçmiş Google Ads menecer hesabının optimization score göstəricisi ən azı 70% olmalıdır. Optimization score Google-un hesab üçün tövsiyələrinə əsaslanan təxmini baldır.

Bu o demək deyil ki, bütün tövsiyələr tətbiq olunmalıdır. Google-un Partners FAQ səhifəsində qeyd olunur ki, tövsiyələri həm tətbiq etmək, həm də uyğun deyilsə rədd etmək olar. Praktikada yaxşı agentlik avtomatik tövsiyələri biznes məntiqi ilə yoxlayır: məsələn, büdcəni artırmaq və ya geniş uyğunluğa (broad match) keçmək tövsiyəsi hər hesab üçün doğru deyil.

2. Xərc: 90 günlük həcm

Şirkət idarə etdiyi hesablar üzrə 90 gün ərzində ən azı 10 000 ABŞ dolları reklam xərcini saxlamalıdır. Bu tələb proqramın əsasən müştəri hesablarını idarə edən agentliklər üçün nəzərdə tutulduğunu göstərir.

3. Sertifikatlar

• Account strateqlərin ən azı 50%-i Google Ads sertifikatına sahib olmalıdır (100 istifadəçi ilə məhdudlaşır).
• 90 gündə ən azı 500 ABŞ dolları xərc olan hər məhsul sahəsində (məsələn, Search, Display, Video, Shopping, Apps) ən azı bir sertifikat olmalıdır.
• Sertifikatların sayılması üçün Skillshop hesabı Google Ads hesabı ilə əlaqələndirilməlidir.

Sertifikatlar ödənişsizdir və Skillshop platformasında verilir. Ətraflı: Google Ads sertifikatları haqqında.

Addım-addım: Google Partner olmaq prosesi

1. Menecer hesabı yaradın və müştəri hesablarını ona bağlayın.
2. Google Partners proqramına qoşulun: menecer hesabında Partners bölməsindən şirkət profili doldurulur.
3. Komandanı sertifikatlaşdırın: strateqlərin Skillshop hesablarını Google Ads ilə əlaqələndirin və əsas məhsul sahələrində imtahan verin.
4. Hesabları optimallaşdırın: tövsiyələri nəzərdən keçirin — uyğun olanları tətbiq edin, uyğun olmayanları əsaslandıraraq rədd edin.
5. Statusu izləyin: Partners bölməsində nişan statusu və hər tələbin vəziyyəti göstərilir.

Freelancer və kiçik komandalar üçün əsas maneə adətən xərc tələbidir. Sertifikat isə hər kəs üçün əlçatandır və biliyi təsdiqləmək üçün faydalıdır, hətta nişan olmasa belə.

Premier Partner: fərq nədir

Premier Partner statusu Partner tələblərindən əlavə nisbi qiymətləndirmə tələb edir: şirkət öz ölkəsindəki iştirakçı şirkətlər arasında ən yaxşı 3%-də olmalıdır. Qiymətləndirmə ildə bir dəfə aparılır.

Google-a görə nəzərə alınan amillər bunlardır: mövcud müştərilərin böyüməsi, yeni müştərilərin böyüməsi, müştərilərin saxlanması, məhsul müxtəlifliyi və illik reklam xərci. Rəsmi səhifədə qeyd olunur ki, Premier Partner statusu bütün ölkələrdə mövcud olmaya bilər.

Statusu necə saxlamaq olar

Tələblər gündəlik yoxlanıldığı üçün nişan bir dəfəlik qazanılan status deyil. Ən çox rast gəlinən risklər:

• Optimization score aşağı düşür: yeni tövsiyələr yarandıqca bal dəyişir; tövsiyələrə müntəzəm baxmaq lazımdır.
• Xərc mövsümi azalır: müştəri itkisi və ya mövsüm 90 günlük həcmi aşağı sala bilər.
• Sertifikatların müddəti bitir: sertifikatlar müəyyən müddət üçün etibarlıdır və yenilənməlidir.
• Komanda dəyişir: yeni strateqlər qoşulanda sertifikatlı payı 50%-dən aşağı düşə bilər.

Tələbləri itirdikdə nə baş verdiyi və ödəniş müddətləri barədə ən aktual məlumat Partners FAQ səhifəsindədir.

Müştəri üçün: agentlik seçərkən nəyə baxmalı

Partner nişanı faydalı siqnaldır, amma tək meyar olmamalıdır. Agentliklə danışarkən bu sualları verin:

1. Mənim sahəmə yaxın layihələrdə hansı nəticələr əldə etmisiniz və bunu necə ölçmüsünüz?
2. Dönüşüm izləmə (GA4, Google Ads conversion, offline import) necə qurulacaq?
3. Hesab kimin adına açılır və giriş hüququ kimdə qalır?
4. Hesabat nə tezlikdə və hansı KPI-larla veriləcək?
5. Hansı tövsiyələri tətbiq etmirsiniz və niyə?

Son sual xüsusilə vacibdir: optimization score-u süni artırmaq üçün bütün tövsiyələri düşünmədən tətbiq etmək müştərinin büdcəsinə zərər verə bilər. Hesabın keyfiyyətini göstərən praktik göstəriciləri Quality Score məqaləsində və Performance Max bələdçisində izah etmişik. KPI seçimi üçün isə marketinq KPI məqaləsinə baxın.

Tez-tez verilən suallar

Nəticə

Google Partner nişanı üç tələbə əsaslanır: optimization score, 90 günlük xərc və sertifikatlı komanda. Tələblər gündəlik yoxlanıldığı üçün statusu saxlamaq davamlı işdir. Google Ads-in digər kanallar arasında yerini rəqəmsal marketinq bələdçisində izah etmişik.

Müştəri üçün nişan başlanğıc siqnaldır, qərar isə nəticə, ölçmə və şəffaflıq əsasında verilməlidir. Google Ads-i özünüz öyrənmək istəyirsinizsə, SEM və Google Ads kursumuza baxa bilərsiniz.