ROAS kalkulyatoru

ROAS necə hesablanır

ROAS reklama xərclənən hər manatın nə qədər gəlir gətirdiyini göstərir. Hesablama sadədir, amma nəticəni düzgün oxumaq üçün marjanı da bilmək lazımdır.

ROAS iki formatda yazılır: əmsal (4,5x) və faiz (450%). Google Ads-in Target ROAS strategiyası faiz formatını istifadə edir: 450% hədəfi o deməkdir ki, hər 1 ₼ xərcə 4,5 ₼ konversiya dəyəri gözlənilir.

Gəlir dedikdə reklam platformasının və ya GA4-ün həmin kampaniyaya aid etdiyi konversiya dəyəri nəzərdə tutulur. Bu rəqəm atribusiya modelindən asılıdır — ətraflı: data-driven və last click atribusiyası.

Break-even ROAS: reklam nə vaxt mənfəət gətirir

Yüksək ROAS özü-özlüyündə mənfəət demək deyil. Məhsulun marjası aşağıdırsa, 4x ROAS da zərərli ola bilər. Break-even ROAS reklamın nə mənfəət, nə zərər gətirdiyi nöqtədir.

Burada marja töhfə marjasıdır (contribution margin): satışdan maya dəyəri, çatdırılma, ödəniş komissiyası kimi hər satışa düşən xərclər çıxılır. İcarə, maaş kimi sabit xərclər bu hesaba daxil edilmir.

ROAS break-even-dən yuxarıdırsa, reklam xərcindən sonra mənfəət qalır. Aşağıdırsa, satış artsa da hər satış zərər gətirir.

Nümunə: onlayn mağaza

Rəqəmlər hipotetikdir və yalnız hesablamanı göstərmək üçündür.

• Aylıq reklam xərci: 1 000 ₼, reklamdan gələn gəlir: 4 500 ₼.
• ROAS = 4 500 / 1 000 = 4,5x (450%).
• Məhsulun satış qiyməti 100 ₼, maya dəyəri 60 ₼, çatdırılma və komissiya 15 ₼ → marja = 25 / 100 = 25%.
• Break-even ROAS = 1 / 0,25 = 4x. ROAS 4,5x olduğu üçün kampaniya mənfəətlidir: 4 500 × 0,25 − 1 000 = 125 ₼.
• Reklam xərcindən sonra satışın 5%-i qədər xalis mənfəət istəyirsinizsə: hədəf ROAS = 1 / (0,25 − 0,05) = 5x (500%).

Eyni kampaniyada marja 20% olsaydı, break-even ROAS 5x olardı və 4,5x ROAS ilə kampaniya zərərdə olardı. Ona görə ROAS hədəfi həmişə marjadan başlayır.

Nəticəni necə oxumalı

1. Əvvəl break-even ROAS-ı tapın — bu, kampaniyanın minimum hədəfidir.
2. ROAS break-even-dən aşağıdırsa: məhsul qrupları, açar sözlər və auditoriyalar üzrə ROAS-a baxın, zərərli seqmentləri ayırın.
3. ROAS break-even-dən xeyli yuxarıdırsa: büdcəni artırmaq üçün yer ola bilər — amma büdcə artdıqca ROAS adətən dəyişir, addım-addım artırın.
4. Google Ads-də Target ROAS qoyarkən hədəfi faizə çevirin (5x → 500%) və strategiyaya öyrənmə üçün vaxt verin. Ətraflı: Performance Max-da büdcə idarəetməsi.

Tez-tez edilən səhvlər

• ROAS-ı ROI ilə qarışdırmaq. ROAS gəliri xərclə müqayisə edir, ROI isə mənfəəti. 300% ROAS 300% mənfəət demək deyil.
• Platforma gəlirini real satış saymaq. Meta və Google eyni satışı ayrı-ayrılıqda özünə yaza bilər. Ümumi nəticəni GA4 və CRM ilə yoxlayın — bax: marketinq KPI-ları və GA4.
• ƏDV-li gəliri və qaytarmaları nəzərə almamaq. Gəlir ƏDV daxil qeyd olunursa və ya qaytarmalar çıxılmırsa, ROAS real vəziyyətdən yüksək görünür.
• Fərqli atribusiya pəncərələrini müqayisə etmək. 7 günlük klik və 1 günlük baxış pəncərəsi ilə hesablanan ROAS 1 günlük klik ROAS-ı ilə eyni şey deyil.

Tez-tez verilən suallar