On-page SEO: meta başlıq, meta təsvir, H1 və daxili keçidlər

On-page SEO nədir və nəyi əhatə edir

On-page SEO-nu texniki SEO və off-page SEO-dan ayırmaq faydalıdır, çünki hər birinin məsuliyyəti fərqlidir. Texniki SEO saytın taranması və sürəti ilə, off-page isə saytdan kənar nüfuzla bağlıdır. On-page isə konkret səhifənin məzmununa aiddir və adətən kontent komandası ilə developer-in birgə işidir.

Bütün SEO istiqamətlərinin ümumi mənzərəsini SEO nədir bələdçimizdə vermişik.

Meta başlıq (title tag): necə yazılmalıdır

Meta başlıq HTML-də <title> teqində yazılan və axtarış nəticəsində mavi başlıq kimi görünən mətndir. O, həm sıralama, həm də klik üçün ən vacib on-page elementidir. Google başlığın necə seçildiyini title link sənədində izah edir.

Uzunluq: neçə simvol

Google simvol sayını deyil, piksel enini kəsir. Praktik qayda: 50–60 simvol arası title masaüstündə adətən tam görünür. Daha uzun başlıqlar "..." ilə kəsilir — bu cəza deyil, amma əsas məlumat sonda qalırsa itə bilər.

Yaxşı title üçün qaydalar

• Əsas açar sözü əvvələ yaxın yerləşdirin.
• Hər səhifənin başlığı unikal olsun — eyni başlıqlı onlarla səhifə Google-u çaşdırır.
• Brend adını sonda qısa əlavə edin: "... | ClickOptimize".
• Səhifənin həqiqətən verdiyi şeyi vəd edin; clickbait başlıq yüksək geri dönmə yaradır.
• Böyük hərflərlə yazmayın və emoji ilə doldurmayın.

Nümunələr

Google başlığı niyə dəyişir

Bəzən Google sizin yazdığınız title əvəzinə H1-i və ya səhifədəki başqa mətni göstərir. Bu adətən title çox uzun, açar sözlə doldurulmuş və ya səhifənin məzmununa uyğun olmayanda baş verir. Həll: title və H1-i bir-birinə yaxın və məzmuna dürüst saxlamaq.

Meta təsvir (meta description): klik üçün yazmaq

Meta təsvir nəticədə başlığın altında görünən qısa izahdır. Google bildirir ki, meta təsvir sıralama siqnalı deyil, amma yaxşı yazılmış təsvir klik sayına təsir edir. Qaydalar snippet sənədində verilib.

Uzunluq və quruluş

Praktikada 150–160 simvol tövsiyə olunur: bu həcm əsas mesajı və bir fayda cümləsini sığdırır. Mobil cihazda daha az görünə bilər, ona görə ən vacib məlumatı ilk 120 simvola yerləşdirin.

• Səhifənin əsas faydasını bir cümlədə deyin.
• Açar sözü təbii şəkildə daxil edin — Google onu qalın şriftlə göstərə bilər.
• Konkret olun: "çatdırılma 24 saatda" ümumi "keyfiyyətli xidmət"dən yaxşıdır (əgər doğrudursa).
• Hər səhifə üçün ayrıca yazın; bütün səhifələrdə eyni təsvir faydasızdır.

Təsvir yazmasam nə olar

Google səhifənin mətnindən özü parça seçəcək. Bəzən bu yaxşı alınır, bəzən isə menyu mətni və ya təsadüfi cümlə görünür. Əsas səhifələr — xidmət, məhsul kateqoriyası, bloq — üçün təsviri özünüz yazmaq daha etibarlıdır.

H1–H3 strukturu və mətn

Meta başlıq və H1 fərqi

Title axtarış nəticəsində, H1 isə səhifənin özündə görünən əsas başlıqdır. Onlar eyni ola bilər, amma eyni olmalı deyil: title qısa və klik üçün, H1 isə oxucu üçün bir az daha təbii yazıla bilər. Hər səhifədə bir H1 olması ən aydın struktur verir.

H2 və H3: məzmun xəritəsi

H2-lər əsas bölmələrdir, H3-lər onların alt hissələri. Yaxşı qurulmuş başlıq ardıcıllığı oxucuya səhifəni skan etməyə, axtarış və AI sistemlərinə isə hər bölmənin hansı suala cavab verdiyini anlamağa kömək edir.

• Başlıqları dizayn üçün deyil, məna üçün istifadə edin (böyük şrift lazımdırsa CSS ilə).
• H2-ləri real istifadəçi suallarına uyğunlaşdırın: "Qiymət nədən asılıdır", "Necə sifariş etmək olar".
• Hər H2-nin ilk abzasında birbaşa cavab verin, detalları sonra əlavə edin.

Mətnin keyfiyyəti

On-page SEO-nun ən böyük hissəsi mətnin özüdür. Səhifə sorğunun niyyətinə tam cavab verməli, təcrübəyə əsaslanan detal (qiymət diapazonu, proses, real nümunə) daşımalıdır. Bu, E-E-A-T siqnallarının əsasını təşkil edir. AI ilə kontent hazırlayırsınızsa, keyfiyyət nəzarəti prosesini bu məqalədə təsvir etmişik.

URL, şəkillər və daxili keçidlər

URL

Qısa, oxunaqlı və mövzunu əks etdirən URL seçin: /xidmetler/seo, /bloq/what-is-seo. Azərbaycan hərfləri (ə, ş, ç) URL-də kodlanır və paylaşanda "e-ticar%C9%99t" kimi görünür — ona görə latın hərfli slug daha praktikdir. URL-i dəyişirsinizsə, köhnə ünvanı mütləq 301 ilə yeni ünvana yönləndirin.

Şəkillər

• Fayl adı mənalı olsun: ofis-kreslosu-qara.webp, IMG_2034.jpg deyil.
• Alt mətn şəkli qısa təsvir etsin; açar sözlə doldurmayın.
• Ölçüləri (width/height) göstərin ki, səhifə yüklənəndə tərpənməsin (CLS).
• WebP/AVIF formatı və düzgün ölçü sürətə kömək edir.

Daxili keçidlər

Daxili keçidlər istifadəçini əlaqəli səhifəyə aparır və Google-a saytın strukturunu göstərir. Keçid mətni (anchor) təsviri olsun: "buraya klikləyin" əvəzinə "texniki SEO yoxlama siyahısı". Yeni məqalə dərc edəndə köhnə əlaqəli yazılardan ona keçid verin — əks halda səhifə "yetim" qalır.

Məsələn, bu məqalədən texniki SEO yoxlama siyahısına və Quality Score məqaləsinə keçid veririk — sonuncu Google Ads-də landing page uyğunluğunun on-page işi ilə necə bağlı olduğunu göstərir.

On-page SEO yoxlama siyahısı (12 bənd)

Hər yeni və ya yenilənən səhifədə dərcdən əvvəl bu siyahını keçin:

1. Səhifənin bir əsas sorğusu və niyyəti müəyyən edilib.
2. Title unikaldır, 50–60 simvoldur, əsas açar söz əvvələ yaxındır.
3. Meta təsvir 150–160 simvoldur və konkret fayda deyir.
4. Bir H1 var və mövzunu aydın göstərir.
5. H2/H3 ardıcıllığı məntiqlidir, real suallara uyğundur.
6. İlk abzas əsas suala birbaşa cavab verir.
7. Mətndə təcrübəyə əsaslanan detal və mənbəli rəqəmlər var.
8. URL qısa və latın hərflidir.
9. Şəkillərin alt mətni və ölçüləri var.
10. Ən azı 3 əlaqəli daxili keçid var, səhifəyə də başqa səhifələrdən keçid verilib.
11. Canonical düzgün özünə və ya əsas versiyaya işarə edir.
12. Dönüşüm elementi (forma, zəng, CTA) görünən yerdədir.

Səhv: bütün səhifələrdə "Ana səhifə | Şirkət adı" tipli eyni title. Search Console-da "Səhifələr" hesabatı və tarama alətləri bu dublikatları tez tapır.

Tez-tez verilən suallar

Nəticə

On-page SEO səhifəni həm oxucu, həm axtarış sistemi üçün aydın edir. Title, meta təsvir, başlıq strukturu və daxili keçidlər düzgün qurulanda eyni kontent daha çox sorğuda görünür və daha çox klik alır.

Bu işi sistemli öyrənmək üçün SEO kursumuza baxa bilərsiniz.